Sharing a sick joke
Binatikos si Pangulong Aquino sa kanyang mga pinagsasabi nang siya ay nasa New Zealand.
Una ay ang kanyang patutsada kay Gloria Arroyo at ang pangalawa ay ang panlalait niya kay Rep. Teddy Casiño ng Bayan Muna.
Gloria Arroyo in a wheelchair November 2011
Sa miting sa Filipino community sa Auckland, sabi ni Aquino:”Share ko ho lang sa inyo isang tawang-tawa ako sa narinig kong joke. Yung mga kababayan raw ho nating corrupt sa Pilipinas, kagagara ng kotse, kamamahal, katutulin. Pero pagka ginustong tumakas, ang ginagamit wheelchair .”
Palakpakan.
Maala-ala natin, noong isang taon, bago siya nasampahan ng kaso at naaresto, tinangka ni Arroyo na mangibang bansa. Galing sa ospital, naka-wheelchair siya ng dumating sa airport.
Ngunit may mga hindi natawa kahit ang mga hindi kakampi ni Arroyo. Bad taste ang dating sabi nila.
Sabi naman ng abogado ni Arroyo na si Ferdinand Topacio: “Dapat tumigil na ang Presidente sa kanyang asta bata na nagpapasa ng text joke. Umaksyon siya ng bagay sa kanyang edad.”
Siyempre palusot naman ang kanyang Deputy Presidential Spokesman na si Abigail Valte. Kaya lang mukhang hindi alam ni Valte nagkabalu-balukto ang palusot niya.
Una sinabi niya, “Hindi naman si President ang gumawa ng joke.”
Sunod, sabi ni Valte, “At the end of the day, it’s not a joke. (Hindi naman talaga joke).”
Hindi nakailangan ng Malacañang maeksplika kung ano ang ibig sabihin ng Pangulo. Pinalakpakan naman siya, dib a. Di okay lang yun.
Di ba sinasabi sa Bibliya (Luke 6:45):”For out of the abundance of the heart his mouth speaks. (Kung ano ang kasaganaang laman ng nasa puso mo, yun ang sasabihin ng iyong mga bibig.)” Kaya masasabi natin, na galing sa kaibuturan ng kanyang puso ang pinagsasabi ng Pangulo.
Kahit ano ang gagawin ni PNoy, palpak man o matino, o kahit wala ngang gagawin okay lang. Popular siya. Sa survey ng Pulse Asia noong Septyembre, 78 porsyento ng mga tinatong aprub sa kanyang mga ginagawa. Sa Social Weather Station naman na survey, kuntento ang 62 porsiyento ng mga tinanong.
Ito ang mga panahon na binanatan siya tungkol sa pagkampi kay dating Interior Secretary Rico Puno na nasangkot sa anomlaya sa pagbili ng mga baril para sa Philippine National Police. Ito rin ang panahon na binabatikos ang Cybercrime law na kanyang pinirmahan noong Septyembre 12.
Sa ganun ba naman na paghanga at tiwala ng tao, bakit naman isipin ni Aquino kung may masaktan sa kanyang sinasabi?
Kaya naman feeling niya may karapatan siya manlait siya ng mga mababa sa survey katulad ni Teddy Casiño na kulelat sa survey ng mga tumatakbong senador para sa 2013.
Ganun lang yun.