Protecting his men?
Kung si Pangulong Aquino lang, wala naman sigurong laman ang kanyang bank accounts na kailangan niyang itago sa publiko.
Kaya lang, kung pipirama siya ng waiver para sa kanyang bank deposits, kailangan din gawin ng lahat na miyembro ng kanyang cabinet.
Ang hiningi nga ni Sen. Alan Peter Cayetano , lahat: COA, Comelec, BIR, Customs, judges, governors, mayors, barangay captains, congressmen, senators.
Diyan magkaka-problema. Ay kung may miyembro siya ng cabinet na may hindi mapaliwanag na kayamanan? Di magkaproblema pa siya.
Kaya sinabi niya na hindi ngayon ang tamang panahon para ipatupad niya ang kanyang pangako noong kampanya na mapirma siya ng waiver o pahintulot para makita ng iba ang laman ng kanyang mga bank accounts.
Kailangan mabigyan niya ang kanyang mga opsiyal ng tamang panahon para ayusin ang kanilang kayamanan.
Pero despalinghado ang pagpaliwanag ni Presidential deputy spokesman Abigail Valte.
Sabi ni Valte, “Balikan natin ang konteksto nitong usapan. Yung akusado, si Corona, ang nanghamon sa bawa’t Tom, Dick at Harry sa mga gustong i-kol ang kanyang hamon. Makatarungan ba na ilagay ang Presidente, na hindi naman na-akusa sa pagnanakaw, hindi na-akusa sa pangsinungaling, sa parehong kategoriya sa taong katatanggal lang sa puwesto?”
Hindi siya nililinya kay Corona. Ito ay tungkol sa ipinangako niya nang siya ay nagkakaampanya. Inaasahan ng taumbayan na gawin ni PNoy ang kanyang bukambibig na “Transparency” at “Accountability.”
Transparency ay nakikita ng taumbayan. Walang tinatago.
Accountability ay panagutan niya ang kanyang mga desisyun.
Iyan ang klase ng pamahalaan ang ipinangako niya noong sinusuyo niya ang boto ng sambayanang Pilipino. Hindi pa akusado si Corona noon. Walang paki-alam dito si Corona.
Sinabi niya ito noong Febrero 23, 2010 sa Hotel Intercontinental sa Makati . Kasama sila ng dalawa pang kandidato sa pagkapresident na si Jamby Madrigal at JC de los Reyes.
Ang okasyun ay “ Second Integrity and Human Rights Conference.”
Kaya may isang tagahanga si Aquino na ngayon ay dismayado. Sabi ni Wally Reyes sa kanyang Facebook account: “Di ba ganito ang style ng mga trapo, pangako na napapako, so anong pagkakaiba ngayon? Akala ko ba, tayo ang mga bosses, eh bakit ayaw tayong pakingan at kung ano anong kabalbalan ang reasons na binibigay para huwag lang sundin ang election promise? Ano na ngayon ang sasabihin ko doon sa mga kinumbinse namin dito sa California na iboto si PNOY dahil naiiba siya sa ibang politico? Pati tuloy kami nag-kampanya sa kanya, nagmumukhang sinungaling doon sa mga kinumbinse namin!”
Problema talaga ngayon yan. Noong nagbobotohan sa impeachment trial, lahat nagsabi na ang desisyun na mag-convict kay Corona ay nag-taas ng antas ng public service. Sabi nga ni Sen. Chiz Escudero tungkol sa tamang pagdeklara ng Statement of Assets, Liabilities and Networth: “Ibig sabihin nito, mula ngayon, pwedeng nang tanggalin sa pwesto ang punong mahistrado pati na rin ang pangulo at ikalawang pangulo at iba pang impeachable officers kapag meron silang di dineklara sa kanilang SALN.”
At dapat iisa ang standard. Hindi naman pwede na mataas ang antas kapag kalaban ng administrasyon at kapag kaalyado, todo-pasa na lang. Kaya hiniling ni Cayetano na utusan ni Pangulo Aquino ang miyembro ng kanyang cabinet na magsign ng waiver. Kung ayaw nila, magresign sila.
Hindi gagawin ni PNoy yan.
