Media blitz
Ganyan ang nangyari kay Chief Justice Renato Corona.
Itong nakaraang linggo, nag-media blitz siya. Pa-interview siya kaliwa’t kanan,mula umaga hanggang hapon. Palipat-lipat ng TV at radio stations.
Siguro ay preparasyon ito sa pagpresenta ng kanyang kampo ng mga ebidensya sa impeachment court mula Lunes. O baka naman dahil sa matindi ang dating ng pahayag ng mga kamag-anak na sina Ana Basa at ang 90-taong gulang na madre na si Sister Flory Basa tungkol sa gulo nila sa kanilang mga minanang ari-arian, naisip niya na kailangan din siya magsalita sa media.
Sinabi ng kanyang abogadong si Atty. Serafin Cuevas na hindi magte-testigo si Corona kaya ang nangyari noong linggo, sa media na lang niya dinadaan. Kahit umangal ang prosecution kasama na si Justice Secretary Leila de Lima, para sa akin okay lang yan. Karapatan ni Corona ang magsalita sa media.
Sa isa niyang interview,sinabi ni Corona na ang nag leak daw ng impormasyun tungkosa kanyang mga deposito sa Philippine Savings Bank ay mismo mga opisyal ng bangko. Noong Nobiembre pa raw niya naririnig na pinagdadaldal ng mga empleyado ng bangko ang kanyang malaking deposito sa bangko.
Kaya nga daw sinara niya kanyang mga deposito doon noong araw na inaprubahan ng House of Representatives ang impeachment sa kanya noong Disyembre 12.
Sabi ng mga opisyal ng PSB, ang total ng tatlong account na isinara nina Corona ay umabot sa P32.6 milyon na sobra-sobra sa P3 milyon lang na inireport niyang kanyang cash at investment sa kanyang Statement of Assets, Liabilities and Networth.
Hindi pa kasali niyan ang hindi na nabuksan na dollar accounts niya sa PSB na uma-abot raw sa $1.8 milyon.
Sinabi kasi ng Supreme Court sa kaso nina Ferdinand Marcos, na si Corona din ang nagponente na kapag malaki ang agwat ng iyong mga kayamanan at ang iyong ni-report sa SALN, ibig sabihin nun, sa hindi legal na paraan kinuha ang ganung kayamanan.
Balik tayo sa pagdadaldal ni Corona.
Ang ginagamit ng mga abogado niya sa pagharang ng mga record ng kanyang mga deposito sa bangko bilang ebidensya na ay ang prinsipyo na ang bunga ng lasong puno ay lason din. Meron kasi tayong bank secrecy law na nagpu-protekta ng pagka-sekreto ng mga deposito sa bangko. May mga exception na nakasad sa batas at ang isa doon ay ang impeachment court.
Ipinresenta ng prosecution ang kopya ng nakuha nilang dokumento ng deposito ni Corona. Binigay nila yun sa impeachment court para i-subpoena ang mga orihinal at iba pang doumento ng mga deposito ni Corona sa PSB.
Ang tanong, paano nakuha ang dokumento na dapat ay sekreto ng bangko? Kasi kung sa ilegal na paraan nakuha ang ebidensya, hindi pwedeng tanggapin ng korte bilang ebidensya. (Noong isang linggo, nag-desisyun na ang impeachment court na tanggapin ang bank deposits ni Corona na ebidensya sa impeachment court.)
Sabi ng isang abogado, ang prinsipyo ng “fruit of the poisoned tree” ay pwede lang gamitin sa mga kawani ng pamahalaan na lumabag ng batas para makuha ang ebidensya. Hindi yan naga-apply sa mga pribadong tao.
Ang suspetsa noon ni Senate President Juan Ponce Enrile ay mga opisyal ng Bangko Sentral ang nag-leak sa prosecution ng impormasyun tungkol sa mga deposito ni Corona. Ang pahayag ni Corona na mga opisyal ng PSB ang nag-leak ay salungat sa sinabi ni Enrile.
Kung tama si Corona, hindi mag-aaply ang “fruit of the poisoned tree” na prinsipyo dahil hindi naman kawani ng pamahalaan ang mga opisyal ng PSB.
At kung nawalan siya ng tiwala sa PSB dahil nga ang suspetsa niya sila ang nag-leak, bakit hindi naman talaga niya inalis doon. Nilipat lang niya ng ibang account.
Hindi magkatugma-tugma ang mga sinasabi niya. Halata tuloy sa kakapa-interview sa media.