Sa 2013 pa ang eleksyun sa pagka-senador ngunit ngayon pa lang pumuporma na ang mga gustong tumakbo.
Sa survey ng Pulse Asia na isinagawa noong isang buwan, pumasok si Justice Secretary Leila de Lima sa sinasabing Magic 12. Kaya kung ang eleksyun ay gagawin ngayong araw, sigurado na sa senado si De Lima.
Ginawa kasi ang survey ng kasagsagan ng kontrobersiya ng pagpigil kay Gloria Arroyo na umalis papuntang ibang bansa.
Makikita natin dito na malaki talaga ang galit ng taumbayan kay Arroyo na lahat na laban sa kanya, bobotohin nila. Sana totoong ganun talaga si De Lima.
At sana aayusin na niya at ng kanyang mga tauhan sa DOJ ang pagpalakas ng kaso laban kay Arroyo at sa kanyang mga galamay para hindi mangyari na sa bandang huli ay madi-dismis lang ang kaso dahil mahina katulad sa mga kaso laban sa mga Marcos.
Ang nangunguna ay si Sen. Francis Escudero na sinundan ni Loren Legarda. Maala-ala natin na noong 2007, si Loren ang una at pangalawa si Escudero.
Pangatlo si Transportation and Communication Secretary Mar Roxas.
Ang pagka-alam ko, hindi tatakbo na senador si Roxas. Mas pinupuntirya niya ang magiging congressman ulit sa Capiz para magiging speaker of the House siya.
Mas maganda ngang strategy yan dahil kung plano pa rin niyang itutuloy ang naudlot niyang ambisyun magiging president sa 2016, mas high profile ang posisyun ng Speaker of the House.
Kung sa senado siya, hindi maganda na pangatlo lang siya kina Chiz at Loren na may mga ambisyon din para sa 2016.
Pasok din sa top 15 sina Cagayan Rep. Juan Ponce Enrile Jr at Aurora Province Rep. Juan Edgardo M. Angara.
Siyempre medyo nakakataas ng kilay. Alam kaya ng mga tinanong sa survey na ang kanilang pinipili ay hisi si Senate President Juan Ponce Enrile at Sen. Edgardo Angara? Marahil aka nila ang pinipili nila ay ang kanilang mga tatay.
Malaki talaga ang matutulong ng pangalan na nakatatak na sa isipan ng taumbayan. Advantage ito sa mga anak na sana gamitin nila para sa taumbayan. Nangyari na ito kay Sen. Aquilino “Koko” Pimentel III na naka-upo na ngayon sa senado kahit na apat na taong naging biktima ng dayaan sa 2007 na eleksyun.
Ang nakinabang naman sa dayaan na yun na si Miguel Zubiri ay kasama rin sa Top 15.
Ang iba pa sa Top 15 ay sina Sen. Alan Cayetano, dating Bise-Presidente Noli de Castro, San Juan Rep. JV Ejercito, Sen. Gregorio Honasan, Se. Antonio Trillanes IV, mga dating senador na si Jamby Madrigal at Richard Gordon.
Marami pa ang maaring mangyari sa loob ng 17 na buwan bago ang 2013 eleksyun. Ngunit mahalaga ang survey para malaman ang pulso ng bayan at malaman ng mga gustong kumandidato kung paano iplano ang kanilang kampanya.