BANGKOK -Nakakabilib talaga ang Thailand pagdating sa turismo. May paraan sila gumawa ng isang ordinariong bagay na kawiling-wili.
Palagi kami nagtatanungan ng aming mga kaibigan na kasama ngayon sa biyahe, kayang-kaya natin ito a. Bakit hindi natin naiisip ito?
Pagdating sa natural na biyaya katulad ng beaches, rivers, hindi nahuhuli ang Pilipinas sa ganda. Para sa akin nga, walang tatalo sa Boracay sa natural na ganda.
Pagdating naman sa pagka-artistic, hindi rin tayo nahuhuli. Bakit hindi natin napapalago ang ating turismo na maaring makapagbigay ng maraming Pilipino.
Ang isang rason ay liderato. Ang ating pamahalaan ay hindi tumitingin ng pangmatagalan. Nandiyan din ang kurakutan. Inu-una ang sariling bulsa. Kese hoda ang sambayanang Pilipino.
Katulad na lang airport. Nakaka-iyak ang NAIA kung ikumpara mo sa airport ng ating mga kapitbahay sa Asia. Huwag na natin isipin sa ibang mundo.
Ang mga Thai, hindi nila hinintay magsikipan ang turista sa kanilang airport para gumawa ng bago. May projection sila kung gaano karami ang bibisita sa Thailand kaya nagpatayo kaagad sila ng modernong airport. Malaki, maliwanag, maaliwalas at hindi mahirap pumunta sa iba’t-ibang parte ng airport.
Sa atin naman, tingnan na lang natin ang sitwasyun sa NAIA1 at maiiyak ka talaga. Ang NAIA3 na sana ay ating pambatong airport ay hindi nagagamit ng husto dahil sa kaso ng grabeng kurakutan.
Nang bumalik ako mula sa Antique noong isang linggo, na atraso ang aming Cebu Pacific flight ng tatlong oras. Kawawa ang mga may connecting flight papuntang labas ng bansa dahil mula sa NAIA 3, pupunta pa sila NAIA1. Sa orihinal na design ng NAIA 3 merong tunnel na nagku-kunekta sa ibang terminal, NAIA 1 at 2 (Centennial Airport na exclusive ngayon sa PAL).
Sa sobrang kurakot, nawala na ang budget para sa tunnel.
Ngayon, merong shuttle bus na nagdadala sa mga pasahero sa tatlong terminal. Ngunit bus yun kaya maghihintay yun ng ibang pasahero. Kung ayaw mo maghintay ng shuttle bus,lalabas ka pa sa NAIA3 , kukuha ng taxi papuntang NAIA 1. Kapag natrapik ka, maiiwanan ka talaga ng iyong eroplano.
Noong mga 1980, halos pareho lang ang dami ng populasyun ng Thailand at Pilipinas. Ngayon tayo ay sobra nang 90 milyon. Ang Thailand naman ay 60 milyon.
Ang dahilan ay seryosong pinapatupad ng pamahalaan ang kanilang population management program. Namimigay sila ng condom sa lahat. Dapat tingnan nito ng mga kumukontra sa Reproductive Health bill.
Sa sobra 60 milyon na populasyun ng Thailand, ang halos kalahati ay nasa Bangkok. Kaya may problema rin sila sa sikip at sa trapik. May joke noon na hindi ma-invade ng Vietnam ang Thailand katulad ng ginawa nila sa Cambodia dahil mata-trapik sila.
Ngunit ginawan ng mga Thai ng pangmatagalan na solusyun ang kanilang problema. Ang kanilang tren, merong underground, merong above ground. Ang kanilang walkway ay parang panibagong highway sa taas.
Malaki rin ang industriya ng Thailand ng mga bulaklak at prutas. Binibigyan nila kasi ng importansya ang agricultural research and development kaya matamis ang kanilang suha, lanzones, sampalok.
Kagagaling lang ni Pangulong Aquino sa Thailand. Pareho tayong Asian kaya may mga problema tayong magkakapareho. Sana nakakuha siya ng leksyun doon kung paano natutugunan ng mga Thai ang kanilang problema na hindi natin nagagawa.
Dapat mainggit tayo sa Thailand. Dapat ang inggit na yan ay gamitin natin para gumawa ng tama at makatulong sa ating pag-unlad.