Ang pagtatalaga ni Gloria Arroyo sa sarili bilang anti-drugs czar, o pangkalahatang hepe sa laban sa ilegal na droga ay nagpapakita ng pagka-inutil ng kanyang administrasyon.
Halata namang gimik lang para maniobra nila at mawala ang isyu sa media at sa isipan ng mga tao. Wala sa priority ni Gloria na masugpo ang ilegal na droga na sumisira ng buhay ng maraming Filipino, karamihan ay mga kabataan. Ang priority ni Arroyo ngayon ay hindi malaglag sa kanyang nakaw na trono.
Ano ang kanyang utos bilang anti-drug czar? Tumigil sa pagsasalita sa media ang mga opisyal ng Department of Justice sa pangunguna ni Justice Secretary Raul Gonzalez at ang mga taga Philippine Drug Enforcement Agency sa pangunguna ni Director General Dionisio Santiago at Maj. Ferdinand Marcelino, hepe ng Special Enforcement Service ng PDEA.
Halatang takot sa katotohanan si Arroyo. Takot siya sa mga katotohanan na isiswalat nina Marcelino dahil malaki ang utang na loob niya kay Gonzalez.
Pinapalabas ng Malacañang na malaking bagay na pina-bakasyon muna ni Arroyo ang mga prosecutors na sangkot sa pagdismis ng kaso laban sa “Alabang boys”. Pinapalamig lang niya ang galit ng publiko. Walang siyang intensyon na ihinto ang maduming kalakaran sa DOJ.
Kapag medyo lumamig na ang interes ng publiko sa kaso ng Alabang boys, sigurado alisin na si Marcelino sa PDEA at ibalik sa military. Baka itapon na ulit siya sa Basilan. Tapos noon, wala na. Balik na sa trabaho at dating gawi ang mga prosecutors. Tuloy ang kanilang ligaya samantalang dumarami ang Filipino na malulong sa droga at masisira ang buhay.
“Si Gloria, drug Czar? Dyuskopo! Hindi na bayong-bayong na manok ang bigayan ngayon diyan.
“Buong poultry na!”
Ito kasi ang sitwasyon: si Arroyo ay naging presidente sa pamamagitan ng pandaraya at paglabag ng Constitution.Una noong inagaw niya ang pagkapangulo kay Joseph Estrada noong 2001. Pangalawa nang nandaya siya noong 2004 eleksyon. Hindi binoto ng mamamayang Pilipino si Arroyo ngunit sa tulong ng marami, napalitan ang resulta ng eleksyon.
Kung tingnan ng mabuti ang patong-patong na eskandalo at anomalya, ang ugat nito ay ang pandaraya ni Arroyo para siya ay manatili sa kapangyarihan. Ang P728 milyon na kinuha ni dating undersecretary Jocjoc Bolante sa pondo para sa abono ng magsasaka ay ginamit para pambili ng boto para kay Gloria.
Bakit ba ang chairman ng Commission on Elections na si Benjamin Abalas ay pumasok sa telecommunication na kontrata (NBN/ZTE)? Kailangan bayaran si Abalos sa malaking serbisyo niya noong 2004 na eleksyon. Papayagan mo ba naman ang dayaan at paggawa ng mga pekeng election returns.
Marami pang kurakutan ang nangyayari at iyon ay kabayaran sa kanilang serbisyo para sa pagpapanatili ni Arroyo sa kapangyarihan.
Kaya lang, hindi madali ang makakita ng proyekto na madali ng pagkakitaan ng malaki. Kaya ang iba, nasa ibang linya katulad ng jueteng. At ang iba naman ay sa ilegal na droga.
Kaya kung isipin mo, ang bumubusog sa maraming mga tauhan ni Arroyo ay pera galing sa sindikato ng droga. Kaya masasabi natin na malaki ang kontribusyon ng mga sindikato ng ilegal na droga sa pagpapanatili sa kapangyarihan ni Arroyo.
Wait, there’s more!: Earn money from your blog! Sell link ads and blog your way to the bank.