Everything in moderation
Lahat yata namimili na para sa Pasko.
Ganyan ang maganda sa mga Pilipino. Kahit mahirap, talagang buhay na buhay ang diwa ng Pasko.
Pilipinas yata ang may pinakamahaba na Christmas season. Pagkatapos ng All Saints at All Souls Day, simula na kaagad ang tugtug ng Jingle Bells sa mga department stores at labasan na ng mga Christmas decors sa mga bahay.
Hindi yan natatapos sa Disyembre 25 o sa New Year. Hanggang Jan.6 yan, ang Three Kings.
At siyempre kapag panahon ng Pasko, kainan. Kaliwa’t-kanan ang Christmas party. Sigurado, pagkatapos ng Pasko, magtatabaan na naman tayo. At ang cholesterol, dios mio.
Nagbigay ng paala-ala si Health Secretary Enrique Ona dahan-dahan lang sa litson at sa alak nitong Kapakuhan dahil yun ang ilang sa sanhi ng atake sa puso.
Ayon kay Dr. Dante Morales, isang cardiologist, mataas ang insidente ng heart attack sa mga buwan ng Disyembre at Enero . Maliban siguro sa pagkain ng marming mantika at alak, nakaka-stress ang traffic at siyempre,ang budget. Kung marami kang anak o ina-anak at kukunti lang ang pera mo, masi-stress ka talaga.
Ngunit ako, palagi ko pinapaalalahanan ang sarili ko na nang maliliit kami sa aming baryo, wala kaming pera at masaya ang mga ala-ala ko ng Pasko. Kung pwedeng noon, pwede rin ngayon.
Sa lifestyle ngayon na maraming oras nasa harap tayo ng computer, talagang hindi nakakabuti sa ating kalusugan. Kaya ang mga nagta-trabaho sa mga call centers, maraming sakit ang lumalabas sa kanila. Dagdagan pa yan ng sobrang kain at alak ngayong panahon, talagang bibigay ang katawan.
Ito ang ilang tips para natin ma-enjoy ang Pasko na hindi tayo magkaroon ng kumplikasyun pagkatapos:
* Hinay-hinay lang sa kainan
* Iwasan ang mamantika at maalat na pagkain
* Kung iinom na alak, konti lang. Huwag mag-drive kapag naka-inom.
* Mag-exercise. Kung hindi sa gym, maaring maglakad, tumakbo at magsayaw. Basta kailangan magpapawis.
* Iwasan ang magpupuyat. Mahalaga ang tulog. Hindi ka makapag-isip ng maayos kapag puyat.
At isa pa: sa sobra din nating abala sa panglabas na parte ng Pasko –handaan at regalo-, minsan nakakalimutan ang diwa ng Pasko- ang pagmamahal at pagpapahalaga sa ating kapwa tao.
Magbigay tayo ng oras nangangailangan. May kaibigan ka bang maysakit? Magandang regalo ang pagbisita.
May kaibigan ka bang matagal nang hindi kayo nakapag-usap. Bakit hindi mo tawagan para kumustahin?