Boy Abunda
May natanggap akong tsismis noong isang araw na binabawi raw ng kampo ni Sen. Manny Villar ang P25 milyon na binayad kay Boy Abunda sa paglabas niya sa political ad kung saan ini-interview niya si Villar tungkol sa kayang pag-asenso sa pamamagitan ng sipag at tiyaga.
Si Sen. Noynoy Aquino na kasi ngayon ang tinutulungan ni Boy na matalik na kaibigan ni Kris Aquino.
Tinanong ko si Boy kung tutuo ang tsismis at natawa lang siya. Hindi totoo sabi niya.
“Nakakahiya naman kina Sen. Villar,” sabi ni Boy.
Pinabulaanan rin ito ng kampo ni Villar itong tsismis ng tinanong ko sa kanila. “Wala kaming ganung kalaking pera,” sabi ni Jan Mata, ang media officer ni Villar.
sabi ni Boy matagal na niyang kaibigan si Villar at ang interview niya na ginawang political ad ay proyekto ng isang grupo na tumutulong sa kanidato ng Nacionalista Party.
Ngunit sabi ni Boy, pumayag siya na gamitin nina Villar ang kanyng interview sa kanya hanggang Oct. 15. Okay lang naman daw kay Kris.
Tungkol naman sa political ads, ang data available sa Nielsen Media Research ay nagpapakita na mula Oktubre 2008 hanggang Mayo 2009 ang nagastos ni Villar ay P321,368,167.
May nagsabi sa amin na hanggang Aogosto 2009, umabot na ng P700 milyon ang gastos ni Villar sa political ads.
Si Mar Roxas naman, hanggang Mayo 2009, nakagastos siya ng P256,742,139. kaya sa kanyang pagatras, masasabi na ng “cut losses” na lang siya. Binawasan niya ang pagkalugi.
Si Gilbert Teodoro, ang kandidato ng Lakas-Kampi,CMD, ay nakagastos ng P30,687,695 sa kanyang ads bilang hepe ng national disaster coordinating agency. Maaring pera natin yun.
Marami ang katulad ni Boy na nalagay sa gitna nang magdesisyun si Noynoy na tatakbo bilang presidente.
Ang isa pang alam ko ay si Gina de Venecia, asawa ni dating House Speaker Jose de Venecia na malapit kay Cory. Isa nga si Gina sa nagsalita noong necrological service ni Cory.
Alam ko tumutulong sina De Venecia kay Villar. Paano na ngayon yan?
Si dating senador Serge Osmeña, na political adviser ni Sen. Chiz Escudero at lumipat na kay Noynoy. Madali naman intinhidin ang kaso ni Serge kasi ang kanyang asawang si Bettina ay isang Lopez na malapit masyado sa pamilyang Aquino.
Sinabi ni Gabby Lopez na malaki ang kanilang utang loob kay Cory Aquino sa pagbalik sa kanilang pamilya ng ABS-CBN at ng Meralco na kinuha sa kanila ni dating Pangulong Marcos nang kanyang idineklara ang martial law.
Tatakbo si Serge para senado na naman at siguradong sa tiket na siya ng Liberal party.
Si Lito Banayo, ang political adviser ni Sen. Ping Lacson at kolumnista ng Malaya ang magiging campaign manager ni Chiz.
Ang iba naman ay balimbing lang. Opurtunista nga ang tawag ko e. Katulad nitong si Foreign Secretary Alberto Romulo na nagpahayag na si Noynoy ang kanyang botohin samantalang miyembro siya ng cabinet ni Arroyo na ang kandidato sa pagka-presidente ay si Defense Secretary Gilbert Teodoro.
Matagal nagmartsa si Cory laban sa paglabag ni Arroyo ng Constitution, hindi man lamang kumibo si Romulo. Ngayon na palubog na si Arroyo, sasabihin niya talagang palagi siyang sa Aquino. Ano ba yan?
Wait, there’s more!: Get cheap domain & hosting from plogHost Powering Ellen’s blog since 2005.