Tuwing tanghali, may misa sa Greenbelt para kay dating Pangulong Cory Aquino. Ito ay siyam na araw na novena na nagsimula noong Miyerkules.
Alam ko na maliban sa mga dumadalo sa misa, marami ang nagdadarasal kay Cory na ngayon ay maselan ang kalagayan dahil sa kanyang sakit na cancer of the colon.
Sinabi ni Deedee Siytangco, ang spokesperson ni Cory, na pinagpasiya na niya pagkatapos ng konsultasyon sa kanyang mga doctor at pamilya na hindi na ipagpatuloy ang chemotherapy. Inalis na siya sa Intensive Care Unit at nasa private room na siya. Ito ay para makakapiling niya ang kanyang mga mahal sa buhay.
Sa edad na 76 ni Cory Aquino, marami siyang nagawa. Ang pinakamahalaga doon ay naging instrumento siya sa pagbabalik ng demokrasya sa Pilipinas.
Kahit ano pa ang sabihin ng iba na depekto niya bilang lider (wala naming taong perpekto), mapagpasensyahan yun dahil sa ginawa niyang pangunahan ang pagpatalsik sa diktaturya ni Marcos at pagbigay ng tapang sa ating mga Pilipino na ipaglaban ang ating demokrasya.
Sa panahon ni Cory, naayos ang Commission on Elections ay napanumbalik ang tiwala ng sambayanan sa Comelec. Mahalaga ang eleksyon para sa tunay na demokrasya. Lahat yun ay sinira naman ni Gloria Arroyo noong 2004.
Kung hindi man natin napangalagaan ang ating mga institutusyon ng demokrasya, sa atin mga mamamayan na ang diperensya.
Pwede naman na mag-enjoy na lang si Cory sa kanyang retirement dahil bilang dating presidente, nire-respeto naman siya sa buong mundo. Kahit saan siya pumupunta at binibigyan siya respeto. At comportable naman siya sa buhay.
Ngunit tuwing may banta ang demokrasya, hindi nag-aatubili si Cory na pumunta sa lansangan. Itong panahon ni Arroyo, ilang beses nag-martsa si Arroyo kahit na tumulong rin siya sa paglukluk sa kanya sa kapangyarihan. Hindi siya nag-atubiling humingi ng tawad kay Estrada sa kanyang pagkakamali.
Noong 2006, nang mabulgar ang “Hello Garci” tapes, sinuportahan niya ang panawagan na mag-resign na si Arroyo. Magkasama sila ni Susan Roces na magmartsa kahit na sabi nila mismo ay medyo nakakahingal na.
Huling sumama si Cory sa rally noong Pebrero 2008 nang mainit ang isyu ng NBN/ZTE. Dalawa sila ni Estrada sa stage kalaban ni Arroyo.
Tayo lahat ay darating sa oras na magpapa-alam sa mundo. Magkaka-iba lang ang petsa at oras. Ang mahalaga ay kung paano mo ginamit ang regalong buhay ng Panginoon.
Masasabi natin na kahit paano, bumuti naman itong mundo dahil kay Cory Aquino.
Wait, there’s more!: Earn money from your blog! Sell link ads and blog your way to the bank.
